Forvo

Forvo estas libera interreta prononca vortaro. En ĝi oni povas serĉi kaj aŭdi vortojn de diversaj lingvoj, prononcitajn de denaskaj aŭ tre bonaj parolantoj. Pri la projekto, kiu celas lingvolernantojn, kunlaboras volontuloj el la tuta mondo, kiuj registras sian voĉon pere de interreta programeto. Ĉiu parolanto indikas ankaŭ sian loĝlandon kaj sekson, pro kio eblas kompari malsamajn akĉentojn. Registrita uzanto povas ankaŭ peti ke denaska parolanto registru iun konkretan vorton. La retpaĝaro de Forvo situas ĉe http://www.forvo.com/

Meze de la jaro 2012 enhavis Forvo jam pli ol 1.330.000 vortojn kun pli ol 1.410.000 prononcoj (sume en ĉiuj 300 lingvoj), kaj inter tio 5.931 prononcojn en Esperanto. Esperanto estas la 30-a plej granda lingvo ĉe Forvo. Ĝian scipovon indikas 115 uzantoj (entute Forvo havas jam preskaŭ 200.000 uzantojn). Bedaŭrinde tamen ne jam ekzistas Esperanta traduko de la retpaĝaro mem (la uzanto-interfaco).

Tiu ĉi eksterreta versio de Forvo estas preparita speciale por la DVD Esperanto Elektronike. Ĝi spegulas la staton el la fino de junio 2012 kaj enhavas ĉiujn (5.931) tiam ĉeestantajn prononcitajn vortojn en Esperanto. La prononcon en formato MP3 oni povas aŭdi (aŭ elŝuti) klakante sur la koncernan vorton en la unua kolumno de la tabelo malsupre. Ĉiun prononcon akompanas kromnomo de la parolanto, informoj pri ties sekso kaj lando, kaj la kvanto de poentoj kiujn tiu prononco ricevis en la retpaĝaro per voĉdonado de aliaj uzantoj (ju pli da poentoj, des pli altkvalita la prononco-registraĵo estas).

Ordigo: Vi povas ordigi la tabelon per klako sur la ĉapon de iu kolumno. Dua klako sur la saman kolumnon renversigas la ordon.

Por spertuloj: Stabila ordigo (elektu, se vi volas ordigi laŭ pluraj kriterioj, kaj poste klaku sur la unuopajn kolumnojn, laŭ kreskanta prioritato – atentu: vi eble devos longe atendi!)