ID = "naskito". Tio, kio staras antaux ID, cxiam montras tion, de kio devenas la naskito.
Normale ID estas uzata cxe besta vorto. Tiam ID montras nematuran beston, junan naskiton de la koncerna bestospeco:
- bovo → bovido = nematura bovo
- koko → kokido = nematura koko
- hundo → hundido = nematura hundo
- rano → ranido = nematura rano
Iafoje oni uzas ID por juna planto:
- arbo → arbido = juna arbo
Cxe homa vorto ID montras infanon, devenulon, sen konsidero de agxo. Oni tiel uzas ID precipe cxe titoloj kaj historiaj nomoj:
- regxo → regxido = infano de regxo
- grafo → grafido = infano de grafo
- Karolo → Karolidoj = dinastio fondita de Karolo la Granda
- Timuro → Timuridoj = princoj devenintaj de sultano Timuro la Lama
- Izraelo → Izraelido = deveninto de la homo Izraelo (Israelano = ano de la lando Israelo)
Iafoje ID estas uzata figure cxe landa aux lingva vorto:
- lando → landido = homo naskita en certa lando, indigxeno
- Latino → Latinida lingvo = lingvo, kiu devenas de Latino
- ido = juna naskito de besto
- idaro = cxiuj idoj aux posteuloj de unu homo (aux besto)