Por montri horon oni sekvu iun el la ĉi-postaj modeloj. La vortojn horo kaj minutoj oni tre ofte nur subkomprenas:
| Cifere | Elparole |
|---|---|
| 3:15 (aŭ 15:15) | Estas la tria (horo) (kaj) dek kvin (minutoj). / Estas dek kvin (minutoj) post la tria (horo). |
| 9:45 (aŭ 21:45) | Estas la naŭa (horo) (kaj) kvardek kvin (minutoj). / Estas dek kvin (minutoj) antaŭ la naŭa (horo). |
Por plia klareco oni povas aldoni la esprimojn en la antaŭtagmezo aŭ antaŭtagmeze, kaj en la posttagmezo aŭ posttagmeze. Sed oni ankaŭ povas uzi la 24-horan sistemon:
Estas la dek kvina (kaj) dek kvin. / Estas dek kvin post la dek kvina.
Estas la dudek unua (kaj) kvardek kvin. / Estas dek kvin antaŭ la dudek unua.
Anstataŭ 15 minutoj oni povas uzi kvarono, kvaronhoro aŭ kvarona horo. Anstataŭ 30 minutoj oni ofte uzas duono, duonhoro aŭ duona horo.
Noto: Anstataŭ 20 minutoj oni tamen ne uzas trionhoro aŭ simile, kvankam tio estus tute logika.
Ne uzu de anstataŭ post aŭ antaŭ en horesprimoj. Ne diru *duono de la naŭa*. Diru duono antaŭ la naŭa aŭ duono post la naŭa depende de la celata signifo.
Horojn oni montras per vicordaj nombrovortoj kun A-finaĵo: tria, naŭa, dek-dua k.t.p. Por demandi pri horo oni do uzas la demandvorton kiom + A-finaĵo → kioma.
Kioma horo estas, gardisto?[FA1.81]
kioma horo estis, kiam vi alvenis?
Noto: Ankaŭ ekzistas la slanga esprimo kiomas? = "kioma horo estas?" Oni ne uzu ĝin en serioza kunteksto.
Por montri, kiam io okazas, oni devas uzi rolmontrilon, normale je, antaŭ, post, ĝis aŭ ĉirkaŭ:
Je (la) kioma horo okazis tio?
Tio okazis je la tria kaj kvardek.
Ŝi venos je la sepa kaj duono.
Ni devas manĝi antaŭ la oka.
Post la dek unua horo ĉio devas esti preta.
Strangaj aferoj komencas okazi ĉirkaŭ la dek dua horo.
Ĝis la dua horo kaj kvarono vi estos liberaj.
Kiam temas pri horoj, oni ne uzu la rolmontrilon N, ĉar oni riskas konfuzi horon kun dato, kiu ankaŭ estas montrata per vicordaj nombrovortoj: je la tria = "je la tria horo", la trian = "en la tria tago de la monato".