tradukoj: be bg de en es fr hu nl pl pt ru

⁹fot/i [1]

⁹foti

fotografi mi volis foti la tiean barilon, sed policisto malpermesis tion [2].

⁹foto

fotografaĵo ĉi tie estas leteroj kaj fotoj de sovetiaj ruĝarmeanoj [3]; oni laŭplaĉe kunmetas fotojn, muzikon, tekston, fonon, kolorojn [4]; ĝi ja estas multflanka fotoalbumo pri Esperantujo [5]; la romano estas kvazaŭ fotobildo (foto) de la tiamaj socioj en Sovet-Unio kaj Germanio [6]; fleksiĝintaj nudigitaj dancistinoj dolĉe rigardas el la grandegaj fotoportretoj [7].
Rim.: Ŝajnas, ke la formo „foto“ estas nun multe pli uzata, ol ĝia teoria ekvivalento „fotaĵo“. Konsiderante, ke la radiko havas verban karakteron, hereditan de ĝia Fundamenta praulo fotograf kaj sankciitan de [8] kaj [9], la uzo de simpla o-derivaĵo por signifi aĵon estas pravigebla per la fakto, ke temas pri „rezulto de fotado“. Male, en [10] oni konsideris, ke la radiko fot ne devenas de fotograf, sed baziĝas sur la internacia vorto „foto“ kaj havas substantivan karakteron. Ĉi tion ŝajnas tamen kontraŭi la aperantaj en la sama verko kunmetaĵoj „kontraŭfoto“ kaj „veturfoto“, difinitaj kiel agoj, aŭ pli kerne la fakto, ke la difinoj de „fotilo“ kaj „fotisto“ pli bone taŭgas por verba, ol por substantiva radiko.
Rim.: Pro nacilingva influo la kunmetaĵoj, de kiuj fot estas la maldekstra elemento, emas konservi la ligvokalon, eĉ kiam ĝi estas tute superflua: fotoalbumo, fotoaparato... Ni konsilas pritrakti la radikon fot kiel iun ajn alian radikon kaj anstataŭe diri: fotalbumo, fotaparato, fot(o)portreto...

fotado

fotografado

fotaĵo

fotografaĵo montrante la miniaturon de la viro en la medaliono, li transdonis al Jane la fotaĵon [11].

fotilo

fotografilo la besto resaltis en la arbaron, antaŭ ol mi povis levi la fotilon [12].

fotisto

fotografisto sur la foto mi gluiĝis al la panjo kaj estis iom timema pro la fotisto kaŝita malantaŭ la nigra tolo de la fotilo [13].

fotaparato, fotoaparato

fotografilo Otto, kun fotoaparato trans la ŝultron, aperis el post la angulo [14]; se vi havas bonan fotoaparaton, ni iros [al la urbodomo], [15]; ĉirkaŭ mian kolon mi metis malmultekostan forĵeteblan fotoaparaton, kiu estis nek malmultekosta, nek forĵetebla, nek nur fotilo [16].