AĈ = "malbona kvalito, sentaŭgeco, senvaloreco". AĈ ne ŝanĝas la bazan signifon de vorto, sed nur aldonas nuancon de malboneco. Komparu kun MIS, kaj kun prefikseca fi. (La sufikso AĈ estis oficialigita en 1909 en la Unua Oficiala Aldono al Universala Vortaro.)
- domo → domaĉo = malbona, kaduka, disfalanta domo
- vesto → vestaĉo = eluzita, malpura vesto
- ĉevalo → ĉevalaĉo = malbona, senvalora ĉevalo
- babili → babilaĉi = stulte, malice babili
- fari → faraĉi = malbone, senzorge fari
- mola → molaĉa = sen dezirata malmoleco aŭ strikteco
- aĉa = malbonkvalita, sentaŭga, senvalora
- Aĉ! = ekkrio, kiu esprimas malkontentecon pri io malbona (legu pli pri tia ĉi uzo de nudaj radikoj)