PMEG

Kiam la radiko de E-vorto havas ecan signifon, la E-vorto normale montras manieron. Tiaj E-vortoj ne multe varias laux la kunteksto:

• bone mangxi = "mangxi karakterizate de boneco"
• veturi rapide = "veturi kun alta rapideco"
• strange granda = "granda en stranga maniero"
• rugxe farbita = "farbita per rugxo"

Kiam la radiko de E-vorto ne havas ecan signifon, la E-vorto montras diversajn signifojn depende de la radiko kaj depende de la kunteksto:

• regxe konduti = "konduti en maniero karakteriza por regxo"
• regxe ricxa = "tiel ricxa kiel regxo, ricxa en regxa maniero"
• logxi urbe = "logxi en urbo"
• okazi tage = "okazi en tago"

Se la radiko havas agan signifon, la E-formo povas signifi "rilate al la koncerna ago, karakterizate de la ago" k.s. La signifo ofte estas simila al ANT-participo aux INT-participo kun E-finajxo:

• konduti time = "konduti kun timo, karakterizate de timo, montrante timon, timante"
• zorge esplori = "esplori kun zorgo, zorgante, zorgeme"
• morte dangxera = "tiel dangxera ke estas risko de morto"
• morte malami = "malami gxis la morto"

Cxe iuj E-vortoj, la signifo estas maniera, kvankam la radiko estas aga:

• La blanka figuro [...] tie sidis, direktinte la rigardon fikse al sudo.^[FA3.28] = ...direktinte la rigardon senmove al sudo.

• Sxi [...] ekkantetis false ian francan kanton.^[M.29] = ...kun falsaj tonoj...

• Mi parolas en gxi [la Franca lingvo] suficxe korekte kaj facile.^[M.57] = ...suficxe senerare...

Legu pli detalajn klarigojn pri tiaj vortoj kun A-finajxo.