tradukoj: be bg de en es fr hu nl pl pt ru sv

^*gvid/i [1]

^*gvidi

1.

Montri la vojon ĝustan.

a)

Montri la vojon, irante kun iu kaj helpante al li por atingi la celon, kiun li intencas trafi: gvidu min kaj konduku min [2]; gvidi blindulon, vizitantojn, fremdulojn en urbo, en muzeo; gvidi ekskursantojn sur la monto; (figure) aliajn gvidas kaj mem ne vidas[3].

b)

(io) Montri la linion ĝuste kondukantan al la celo, direkti la movon al la celo: la pafiltubo gvidas la okulon al la celpunkto; la polusa stelo gvidis la iradon de la esploristoj; kompaso gvidas la maristojn; diversaj markoj gvidis ilin sur la ĝusta vojo.

2.

(iu aŭ io)(figure) Sciigi, klarigi, organizi la agadon ĝustan por iu celo, agi kiel vojmontranto: gvidi la publikan opinion; mi devas gvidi la ellaboradon de la ĉapeloj [4]; liaj pasioj gvidis lin; gvidi ies konduton, konsciencon; gvidi esperantan kurson. direkti, konduki ⁵

sin gvidi

1.

Trovi la direkton: la maristoj sin gvidas per la kompaso; sin gvidi per palpado en la mallumo; ĉiu sin gvidas, kiel li vidas[5]. orienti.

2.

Esti gvidata: sin gvidi per naciaj gustoj, per simpatioj aŭ antipatioj^Z, per severaj principoj^Z, per kaprico^Z, per ekstera ŝajno^Z; la lingvo Esperanto ĝuste per tiu ĉi leĝo sin gvidis [6].

gvidado

Ago de iu aŭ io, kiu gvidas: ekskurso sub la gvidado de la E-ista grupo; per gvidado de ŝnuro, kompaso; laŭ sia propra gvido (proprainiciate) labori [7]; gvidado de kurso; riĉeco sen gvido, kiel ĉevalo sen brido[8].

gvida

Kiu gvidas: gvida punkto, modelo^Z, principo.

gvidilo

1.

Io, kio servas por gvidi: (arkaismo) gvidilo de pafilo (butoneto montranta la rektan linion al la celo, sinonimo: celgrajno) ; (arkaismo) gvidilo de ciklo^Z (sinonimo: direktilo); (figure) tiu principo servis al li kiel gvidilo dum lia tuta vivo; plej bona gvidilo estas la lango (ĉar ĝi ebligas informiĝi) [9].

2.

Gvidfolio, gvidlibreto: la organiza komitato publikigis kompletan gvidilon pri la kongresa urbo.

gvidisto

1.

Homo, kiu profesie gvidas vojaĝantojn: du gvidistoj, senditaj por serĉi la malfeliĉajn turistojn, revenis, ne ilin trovinte [10].

2.

Homo, kiu gvidas la agadon de grupo: via ekscelenco ordonis doni al iu oficiro kvincent bastonbatojn, kaj pendigi la gvidiston [11]; la gvidistoj de la politikaj partioj anoncis la 22an de novembro ke ili kunlaboros [12]

misgvida

Trompa, gvidanta al malĝusta direkto, malĝusta opinio: svarmis misgvidaj esprimoj, kiuj kaŭzis multe da malbono [13].