tradukoj: be ca cs de en es fr hu lat nl pl pt ru sv tp

^*tut/a

^*tuta

Rigardata en sia kompleto, sen escepto aŭ manko: Esperanto celas esti la lingvo de la tuta mondo; mia tuta ŝuldo estos pagita al vi baldaŭ [1]; la tuta supraĵo de la lago estis kovrita per naĝantaj folioj [2]; ni laboris dum la tuta tago; mi jam legis la tutan libron; li ne volis krei laŭ sia persona plaĉo la tutan lingvon de l' kapo ĝis la piedoj^Z. elĉerpa, kompleta, plena ²

^*tute

Plene, komplete, senescepte: li estas tute nuda^Z; mi estas tute trankvila [3]; ŝi mem tute ne zorgas pri si [4]; tute nekomprenebla [5]; viaj grenejoj tute pleniĝos [6]; tute ne atendite [7]; mi ne tute finis; mi tute ne volas.
Rim.: La radiko tut estas ankaŭ prefikse uzata, kun adjektiva aŭ adverba senco: tutmonda; tutaĉeti, tutlegi.

tuto

Aĵo aŭ aro, kiun oni rigardas kiel unu aferon, ne konsiderante partojn: tiu teritorio estas geografia tuto.

tutaĵo

Io, al kio mankas neniu parto kaj kiu konsistigas apartan unuecan kunaĵon: la tutaĵon de la ŝipoj de iu lando oni nomas ŝiparo^B; li faris kvindek kuprajn hoketojn, por kunigi la tendon, por ke ĝi estu unu tutaĵo [8]; oni disrompas vazon de potisto, ke ĝi ne povas esti tutaĵigita [9].

tuteco

Eco de tio, kio estas kompleta: konsideri demandon en ĝia tuteco^B.

tuteca

(p.p. ordo-rilato ≤) Tia, ke por du elementoj x kaj y ĉiam veras x ≤ y aŭ y ≤ x: la kutima ordo super la aro de reeloj estas tuteca. parta.
Rim.: Ŝajnas al ni, ke „tuteca“ estas taŭga antonimo por „parta“, sed pluraj naciaj lingvoj preferas metaforon pri la „linia“ vicigeblo de la elementoj aŭ pri la „konekseco“ de la rilato (ja en grafeo de la rilato du ajnajn punktojn ligas almenaŭ unu sago). En [10] troviĝas „linie orda aro“.

entute

1.

Ĝenerale; konsiderante la aferon en ĝia tuteco, laŭ ĝenerala vidpunkto kaj forlasante la apartajn detalojn: al multaj ordinare ŝajnas, ke, se ili ne aprobas tiun aŭ alian formon de ia ideo, ili nepre devas ataki la ideon mem entute^Z; multaj faris kontraŭparolojn kontraŭ la ideo de lingvo internacia entute, kaj de lingvo arta speciale^Z; lia morto estis granda bato por nia afero entute kaj speciale por ĝia disvastiĝado en Germanujo^Z; entute mi konsilas pli uzadi formojn simplajn anstataŭ kunmetitaj^Z; li ne dubas pri la utileco de lingvo internacia entute^Z; la falo de Volapük alportis grandan malutilon al nia ideo entute^Z; paroli pri ŝanĝoj entute^Z.

2.

Konklude; resume; ĉion konsiderante kaj interkompensante: povas esti demando pri la tempo, sed neniu dubas, ke tiu ĉi fakto entute iam venos^Z; tiu ĉi ideo entute en la publiko ne estas hejme, kiel ĝi devus esti [11].

3.

(evitinde) Sume; ĉiom; ĉion kalkulante: mi havas entute nur 25 rublojn^Z; entute la nombro de la delegitoj estis 33; entute la vivo estas nemultekosta en tiu lando.